台語文學評論-話e角度-2

。

佫講：話 ê 角度

。

進前有講過，就「話」êh 角度來講，林文平先生 êh 詩讀起來順口，卡符合台語 êh 語感 kah 語音習慣。Zid 期 (2012-1 / 第 25 號) êh《台文戰線》又佫有刊林文平先生 êh 詩：『看見援中港濕地』，引起我 êh 興趣：

『看見援中港濕地』

一堀一堀

拋荒的魚塭仔

是土地靈魂的目睭

夾佇後勁溪佮典寶溪之間

撐金金咧看城市的風雲

兩條五花十色的溪水

來到遮，只偆一款虔誠

定定用深閣沉的屈勢

咧試拖海峽的鹹 tsiánn

有時陣，遮變成一个澹濕的肺

牽挽台17線公路來來去去的車輛

佮蚵仔寮外海往往回回的船隻

吞吞吐吐的氣絲

但是，一滴海茄苳的目屎

‧ 一點紅管仙的汗

才是伊上大的牽掛

這種牽掛寫出濕地上鮮尺的主張

黃昏的日頭

佇海茄苳佮移民來的苦林盤之間

洩出一港一港向夢，當咧閃熾

有一陣白翎鷥展翅

捲來一波一波鹹閣鹹的海湧

將濕地的光景豉(sīnn) 起來

一時間，港都的海風

又閣升一个 key

討論 êh 點：

(1)「紅管仙」：作者註講是「招潮蟹」，《台日大辭典》上卷 21 頁下欄第一行：「紅管

管獅」：(動) 一種淡水產小蟹。澤蟹。意思是：一種「腳-kong 紅紅 êh 細隻 nzyazúii 毛蟹。「招潮蟹」、彰、雲、嘉一帶 êh 人叫做「giahvehnsyih’ya (糇白扇仔)。

。

(2) 尾仔第 9 行：「這種牽掛寫出濕地上鮮尺的主張」，zid 段可以讀做：「這種牽掛寫出濕地上『鮮尺』的主張」，若用純台語 êh 角度也可以讀做：「這種牽掛寫出濕地『上鮮尺』的主張」，因為「濕地上」真歹講是一句純台語；不過，既然頭前有「夾佇後勁溪佮典寶溪之間」，想 kong ia 是讀做：「這種牽掛寫出 [濕地上] [鮮尺] 的主張」可能卡正確。

「鮮尺」是啥乜？真歹勢！「老猴跋落樹」，我直接 êh 感覺是一個地名，因為北部新店附近有一個所在叫做「屈尺」；或者是啥乜植物 êh 名。不過，嘛有可能是一個形容詞，若是一個形容詞，是「鮮」kah「尺」合成 êh 一個新造詞 (？)。

問題出在「尺」(cirh) zid 句話，查了《台日大辭典》dīh (下卷第 194 頁中欄 ) kānnā 有：

u「尺」………量長度 êh 傢俬。

v「臅」……… 豬 êh 膵臟。

w「螫」……… 蟲刺咬。

x「浞」……… 用水抹濕。

漏去表現親像中文 êh「鮮明的」、「班班可見」或「歷歷可見」êh 詞語，親像：「傷痕一 qang cirh-cirh」、「一 qang 爛 kah cirh-cirh」、「尻倉 kauh kah cirh-cirh」。其他台語辭典包括我 kahkī êh《台語四用漢字字源》攏漏去 zid 句詞，尋無會用得應用 êh 漢字，是一句沉 dīh 甕底 êh 固有語，「尺」可能是作者假借 êh 漢字。

Mhkurh，若是「鮮尺」(sen-cirh) 我安怎讀、安怎想，叨無法度感受作者所 beh 表現講 êh 心情 kah 意義，查了三日 ziah dīh 網路頂 kûan 查 dirh「鮮尺」原來是 beh 讀做 “ncyīcirh” (台羅：tshinn- tshioh)。

“Ncyīcirh” ( 台羅: tshinn-tshioh)、《台日大辭典》dīh ( 下卷第 121 頁下欄 ) 尾仔行寫做：「嫩鮮」；「鮮尺」、「嫩鮮」攏是假借 êh 白字，問題是《台日大辭典》êh「嫩鮮」屬會意，「鮮尺」是「會意」(鮮) cām 「形聲」 (尺) 所合成 ê，「會意」讀也 būeh 用得，「形聲」讀也 būeh 用得。

其實「鮮尺」、「嫩鮮」beh 讀做 “ncyīcirh” (台羅：tshinn- tshioh) 比寫做「青尺」卡困難。 Mhkurh「青尺」嘛容易 hông 誤會做「青色 êh 尺」，所以講漢字 dīh 台語文是有伊 êh 極限 dī lē。

(3) 尾仔第 5 行：「有一陣白翎鷥展翅」êh「展」字，beh 讀做 “dén” ia 是讀 “tén” 呢？台語 êh “dén”、“tén” 分 kah 真清楚，“dén” 除開「展示」以外，表示事物膨脹變大，親像：「展威」、「粒仔展大」；“tén” 是「開大」ia「放大」，親像：「téen 開袋仔嘴」ia「téen 開包袱仔」，kah 中文 êh「破綻」、「百花綻放」êh「綻」字意義相通。